Là che la val dal flum Fele si strenzeve in maniere naturâl vierzintsi po dopo a sud, li e nasseve Causa, dopo Chiusa, la Scluse dal dì di vuê. Il Borc di Campolaro tal vieli toponim al tapone lis sôs probabilis origjins celtichis che dopo a àn dât vite a une mansio romane, confermade di reperts archeologjics, sul itinerari dal imperadôr Antonino (II secul d.C.).
Ma il fat che e je stade cjatade in zone une spade a dopli tai a puarte a datâ adiriture al VIII-VII secul a.C. la presince dal om dilunc il percors che, dal Adriatic, al judave il scjavaçâ lis Alps viers la Europe Centrâl. Probabilmentri fin di chês etis lontanis a si ere pensât a fortificâ chestis zonis par difindi i trafics che a traspuartavin viers Nord i prodots dal mediterani, impuartant de Europe centri setentrionâl materiâi preziôs tant che il sâl, lis pelicis, l'aur, il fier e la ambre magjiche.
Notiziis siguris su lis oparis di fortificazion a son di datâ invezit al an 1000, cuant che l'imperadôr Oton III al concêt la Chiusa al patriarcje di Acuilee che, tal 1255 a indi cedarà la gjestion a cierts marcjadants senês. Cent agns dopo lis oparis a forin inmò di plui rinfuarçadis. Tal stes timp a àn vût un grant disvilup i pascui sul plan dal Montasio che ur veve ben la famee furlane Di Prampero: a podevin tignî plui di 5000 bestiis.
Dopo la fin dal podê temporâl dal Patriarcjât di Aquilee (1420) il teritori al è passât sot dal domini venit e tai ultins vincj agns dal XV secul si à pensât a un ampliament de struture fortificade par frontâ lis pussibilis incursions dai Turcs che a vevin bielzà fat scorsadis te plane furlane e a menaçavin di la sù pal Lusinç.
Daspò lis vueris jenfri la Serenissime e l'imperi Asburgjic finidis cui tratâts di Worms (1521), al tacà il declini de Glesie dal pont di viste strategjic tant che e fo in pratiche abandonade. Dopo la fin cence glorie de Republiche Venete, cuant che lis trupis di Napoleon a rivarin di sud tal Març dal 1797, no cjatarin resistence di bande dai austriacs che la vevin ocupade confidant di resisti. Il stes Napoleon la à judicade aromai vecje; plui tart, par ordin dal Guvier di Viene (1833) che a chest aromai e faseve riferiment dute la regjon, la fuartece e fo butade jù. Il secul a pene passât al à leât il teritori a lis vicendis de Prime Vuere mondiâl, in particolâr te zone di Sele Nevee, dilunc la cjadene dal Canin e sul plan dal Montasio, li che a jerin lis liniis dal front a cuotis superiôrs ai 2000 metris di altece. Tal Otubar dal 1917, cu la disfate di Caporet, la Val Racolan e fo une des primis valadis a jessi invadudis e il fuart coraçât fat su sul tacâ dal 1900 a val dal paîs di Vilegnove, a Scluse, al fo il prin, inutil sbarament che l'esercit austriac al à superât te calade viers la planure furlane.
Vuê i edificis che a meretin la atenzion dal pont di viste storic e architetonic, ducj catalogâts di orghins regjonâi competents a si cjatin soredut tal cjâf lûc. Di Nord si cjate la cjase Della Mea, fate su daûr i modui tipics de architeture cjargnele, daspò la cjase Fontebasso dal votcent e l'ex albierc Pesamosca che al è li dongje. Tal borc antîc di Campolaro cjatìn la cjase Pesamosca e chê cussì clamade Zannier, tipiche residence signorîl, dutis dôs dal sietcent. Plui a sud cjase Revelant, cjase D'Olif e cjase Samoncini a Vilegnove, e ancje cjase Della Mea a Racolane, a son proviodudis di elements storics e architetonics che a meretin atenzion. La Val Racolane e presente tipologjiis tipichis de mont: une vore interessante e je la localitât Pitocco a 800 metris di altece cuntune viodude panoramiche su dute la val: e je stade ogjet di un preseât recupar des cjasis. Di segnalâ ancje pe posizion panoramiche sore il cjâf lûc la gleseute votive in localitât Raunis e che sot dal MOnt Canin (m. 1850) dedicate ai muarts di dutis lis vueris.
Tantis a son lis testemoneancis de prime vuere mondiâl: a sud, che si viôt de strade statâl, al è il Fuart di Colle Badin, invezit la zone di Sella Nevea e à cetancj rescj di mulatieris, trinceis, baracaments e ripârs dilunc la cjadene dal Canin e l'altiplan dal Montasio, dulà che cumò si sta proviodint al recupar e ae valorizazion. tai ultins timps, a nord no lontan dal cjâf lûc si son cjatâts rescj de antighe glesie parochiâl di prin dai 1400 dutun cu la cjase de antighe Chiusa.